Etxebizitzak saldu ezinik, krisian dira etxe agentziak eta baita beren etxeak salmentan dituztenak ere. Ez gaude jada etxebizitzak hain garesti erosteko prest, batzuk %98 beren balioaren gainetik saldu direla aintzat hartuta. Hori horrela, beherapenak noiz iritsiko zain dago jendea

Salgai: Etxebizitza argitsua Antiguon. Zazpigarren solairuan dago. Itsasoa ikusten da. Hegoalderantz orientatua dago eta eguzkiak ederki jotzen du egun osoan zehar. Laurogeita hamar metro koadro ditu, sala handi bat, sukaldea, bi bainugela eta hiru logela. Balkoia, eta mahai bat eta aulki batzuk jartzeko moduko terrazatxo bat du.
Marivi Bahamondek duela sei hilabete jarri zuen bere pisua salgai eta ez du hortik ateratzeko momentua gertuegi ikusten. Bere familiarekin Avilako Gredoseko mendilerrora bizitzera joan nahi du bizilagunik gabeko etxe handi batera. “Finka bat erosi nahi dugu, etxez aldatu ez ezik, bizitzaz aldatu nahi dugulako”. Hemengo lanak utzita, gestoria eta diseinu grafikoa utzita, abentura batean sartzeko prest daude Gredoseko mendilerroan, bizilekua eta lantokia bat eginez nekazalturismoko etxea jarrita. Horretarako ordea ezinbesteko dute Antiguoko etxea lehenbailehen saltzea. Iragan abenduan salgai jarri zutenetik, lau pertsona baino ez dira joan pisua ikustera. “Oso mugimendu gutxi ikusten dugu eta egoera okerrera doa”. Ez dute inolako deirik jaso lau pertsona horien eskutik eta zain jarraitzen dute pazientzia handiarekin. “Bai, batzuei asko gustatu zitzaien baina azkenean eskaintza handia dagoenez pentsatzen dut beste bat aukeratu zutela. Nire ustetan une honetan erosle gutxi eta eskaintza asko dago”, dio Marivik..

Olaia Razkin .

Aldaketa 236. zk. (PDF) 3.9MB