Duela zenbait urte bateraezinak ziruditen bi mundu lotzen dihardu ‘Disonancias’ egitasmoak: enpresa eta artea. Azken produktu iraultzaile eta berritzailea lortzea baino gehiago, enpresetan jarrerak txertatzea da helburua.

Jo dezagun karikaturara. Irudika dezagun, alde batetik, artista bizardun, bohemio eta kaotiko bat, munduarekin haserre bizi dena, bere praktika artistikoarekin liluratuta. Nahas dezagun artista hori, traje gorbatadun eta 300 euroko orrazkera duen negozio gizonarekin, eta egia absolutuaren jabe dela uste duen ingeniari grisa eta egoskorrarekin. Zer aterako litzateke, hirurak elkarrekin lanean jarriko bagenitu? Ezer onik ez, karikatura serio hartuko bagenu. Txiste bat. Baina, zorionez, eta askotan halako topikoekin funtzionatzen badugu ere, errealitatea askoz ere anitzagoa eta aberatsagoa da. Horregatik da posible gaur egun ustezko mundu arrotz horiek batzen dituen Disonancias egitasmoa.
Baina zer da Disonancias? Protagonisten esanetan, “esperimentu bat”, edo “helmugarik gabeko bidaia bat”. Askoren ustetan bateragarriak ez diren bi esparru uztartuz, enpresa eta artea, onuragarriak izan daitezkeen konexio ezkutuak bilatzea. Irakurleak ideia zehatzago bat egite aldera, jo dezagun egitasmoaren antolatzaileek egiten duten azalpenera. “Ikerketa proiektu bat garatu nahi duten enpresei artistak eskaintzen dizkiegu. Erabakitzen dute zein ideia edo prototipo garatu nahi duten. Guk nazioarteko deialdia irekitzen dugu orduan, hartara artistek badakite zeintzuk diren aukerak”. Arantxa Mendiharat koordinatzailearen hitzak dira.

Xabier L. Labaien

Aldaketa 223. zk. (PDF) 2,9 MB